花旗參豬腱湯

濕度百份之廿四，

晾衫就正，

但人都乾埋，

再唔煲湯肯定被投訴！

呢碗係懶人靚湯，

潤肺除燥，

養陰清熱，

四季皆宜！

材料簡單，

只有數粒花旗參、2片果皮、少許南北杏、4粒無花果，

加30蚊豬腱。



豬腱汆水，

果皮浸軟去瓤，

將果皮、南北杏、無花果、豬腱齊水煲一小時，

加入原粒花旗參煲半小時後取出剪開，

放回多煲半小時，

飲得！

蒜香江瑤柱（偽）

小由指住呢碟餸一字一字發音非常準確 ~

“由由要江瑤柱”

食完又要，

真識食！

幸好食多幾粒都唔怕難消化，

呢幾粒係杏鮑菇嚟，

幾可亂真，

就連味道都十分相似，

仲要無渣。

用牛油、蒜茸煎杏鮑菇粒，

家中無干貝醬油，

改用瑤柱水、生抽、糖、胡椒粉、生粉水收汁，

偽干貝上碟！

食譜來源  ;  黃金偽干貝

豉味三文魚

呢件三文魚係用咗幾粒大孖醬園嘅盤鹽醃半日，

原來真係好香豉味，

聞說此乃生曬醬油時所產生的晶鹽，

多用作湯水調味提鮮。

養生素菜

材料   :   蕃茄            4    個

               鮮百合        1    包

               鮮磨菇        8     粒

               絲瓜            1     條

做法   :   蕃茄洗淨，一開八連皮切

               鮮百合清洗乾淨，剝開一片片

               鮮磨菇切片

               絲瓜切段

               熱鍋加油，下絲瓜兜炒，加入磨菇、蕃茄炒至絲瓜軟身，

               加入鮮百合，兜炒至百合開始轉透明色，

               加入鹽、糖、（非素食者可加入雞粉），上碟前沿鍋邊淋上 3/4 茶匙白醋

              

清湯蘿蔔腩

網上看到日本人用牙簽刺入蘿蔔後徒手剝皮，

很想證實這方法是否僅適用於日本大根，

原來此方法可用於任何產地蘿蔔，

疑團解開，

換來是蠢人大姆指疼痛幾粒鐘！

有個蘿蔔，

冰箱又有包牛肋條，

順手煮碟清湯腩之A貨版！

材料  ：  牛肋條半包

                蘿蔔    一根

                八角    一粒

                雞湯    一盒（中）

                薑片、冰糖、蔥粒適量

    

牛肋條兩面煎至微黃，

加薑片爆香，

加入八角、冰糖、雞湯和清水（等量）炆煮40分鐘，

落蘿蔔炆30分鐘，

熄火焗約30分鐘後，

再炆煮至蘿蔔呈透明狀，

灑上蔥粒上碟！

鮮茄菜花牛肉

剛在阿虎按備份下載，

也刪除一些可有可無的，

不覺可惜，

此地不留人，

自有留人處，

沒感到失落呢！

今晚煮呢碟鮮茄椰菜花是兒時的味道，

加少許牛肉，

鮮茄帶微酸又係一味連汁都撈埋的開胃菜！







記憶最深是寫第一篇網誌 ~ 地鐵怪客

算是原動力吧，

眨眼間已是五年多了，

不過想起都有啲反胃！


回憶那天中午在調景嶺站車廂內看見一婦人走進來，

剛坐下馬上從手袋拿出指甲鉗，

不用兩個站車程已剪完腳甲，

攪到座位同地下都有趾甲屑，

真係咁趕？

公德心何在？

金針菇泡菜煎蛋

少吃多滋味，

金菇去尾，

切三段，

白鑊或麻油兜炒至出多醣體（黏液）加少少生抽調味，

取出加入切碎泡菜、蔥粒、混入蛋液，

煎成蛋餅！

二隻雞蛋加一包金針菇，

拾蚊有找！

金針菇是養生食材，

小小的菇能利肝臟，

益腸胃，

含多種氨基酸，

高蛋白質，

促進新陳代謝，

防高血脂，

降膽固醇，

抗病毒性感染。

但脾虛者不宜多吃！

雜錦銀針粉

手動搬blog搬到眼都矇，

記得註標籤時，

又唔記得改日期，

揀相揀到暈，

算罷！

這篇不潛水！

完全忘記如何做銀針粉，

印象中包粉果時剩下的澄麵粉糰一定不會浪費，

會掐小小份量，

在桌上揉成兩頭尖後，

用作放湯或炒。

曾試加入木薯粉做銀針粉，

可能份量錯誤，

口感的確是QQ的，

可惜吃了胃不舒服兩天 !

再接再厲 !

不加木薯粉，

改用玉米粉加澄麵，

滾水燙麵，

加少許油揉成麵糰，

放10分鐘，

掐小小份量揉成兩頭尖，

加少許油放鍋中蒸7 - 10分鐘，

轉透明即可 !

鳳梨洋蔥三文魚骨

這是一道惹味開胃菜，

煎三文魚骨香脆，

鳳梨的酸酸甜甜，

洋蔥的香甜，

三文魚骨加入酸甜鳳梨中和油膩，

是不錯的下飯菜！

材料  :  三文魚骨   一條

             洋蔥           一粒

             鳳梨           三片

             紅椒、薑少許

做法    :  魚骨切大塊，洗淨抹乾水份，加入薑汁、鹽、胡椒粉、

               糖、紹酒、生粉醃15分鐘

               洋蔥切幼絲

               鳳梨切粒

               紅椒、薑切絲

               熱鍋加少許油，放入三文魚骨煎香，盛起，倒去鍋中油，

               爆香洋蔥，加入鳳梨、紅椒絲兜勻，放三文魚回鍋拌炒，上碟

XO醬炒蘿蔔糕

每次在茶樓吃炒蘿蔔糕，總是油膩，吃不到一半，看見碟底滿滿油，怕怕！

一杯清香鐵觀音與煎蘿蔔糕，好滿足！

“難得糊塗”是我最想走的路

靈芝桂圓湯

習慣用三幾片靈芝加羅漢果煲水，

因可蓋過靈芝的苦澀，

大火煲靈芝15分鐘後，

加入羅漢果煲15分鐘，

收火，

焗20分鐘！

又曾聽過雲芝、靈芝不要清洗，

這當然不會相信，

縱使有理據，

都不會依從！

又聽過煲靈芝要先浸透，

只須大火煲約15分鐘，

一份靈芝可煲三次水，

第四次加入其他材料煲靈芝湯！

文章轉載蘋果日報  名采  半畝田   ( 嚴浩 )

靈芝的效用我從來存疑，

因為曾經朋友間起哄，

你買我買買了一大堆靈芝天天在家裏煲水，

又苦又澀，

卻不見有什麼效果。

食神肥艾迪把我的印象完全改變。

首先肥艾迪是個有科學頭腦的人，

一切講數據，

連煮飯放調料也會精細到用電子磅秤份量。

他首先搜查靈芝的優缺點，

要知「是藥三分毒」，

結果發現：

所有草藥吃過量都會中毒，

唯獨靈芝吃過量也不會在身體中產生毒素。

靈芝的主要作用是雙向調整免疫系統。

我從前服靈芝湯沒有效，

是方法不對。

靈芝需要桂圓作藥引，

肥艾迪的煲靈芝湯方法：

靈芝一百一十克，

桂圓十五至廿五粒，

血糖高者減半。

放瓦煲中，

用八百毫升的水四瓶，

大火轉小火把水從四瓶煮到三瓶。

然後不時加水保持煲中有三瓶水的份量，

前後共需四小時。

每次飲一百五十毫升，

一天喝一次，

睡前兩小時喝。

以上份量可以喝十一天，

煮好的湯可以入樽放雪櫃，

喝前加熱保溫。

肥艾迪喝了兩個星期後，

基本停止了頻繁的夜尿，

身上臉上水腫消失，

「連皮鞋都大了」，他說。

肥艾迪不推薦現成的靈芝丸。

靈芝不貴，

去國貨公司或上環都買得到。

潤肺養顏 ~ 雪耳蘋果湯

今日濕度百份之四十五，

晨早開機洗衫，

第一機中午時已乾得七七八八，

趁機又洗多一機毛巾、床單，

黃昏又差不多已乾透，

呢碗湯最適合咁乾燥天氣！

蘋果雪耳湯可作鹹湯或糖水，

不加瘦肉改為加少量冰糖，

同樣可清心潤肺養顏 !

材料  :   雪耳        2 朵

             瘦肉       25 元

             紅蘋果    3 個  （可用鴨嘴梨代替）

             海底椰、南北杏、無花果、陳皮適量

                

做法  :   陳皮浸軟去瓤

             雪耳浸透汆水

             瘦肉汆水

             紅蘋果一開四，去心

             凍水加陳皮煲至水滾，加入所有材料   ~ 

             大火煲30分鐘，

             轉中小火煲約2小時

鮮茄紅衫魚

每朝都會到固定魚檔買魚，

買慣買熟很少問價錢，

今日呢兩條紅衫魚，

聽錯價以為30蚊，

仲以為執到，

原來一斤賣80蚊，

兩條70！

越食越貴，

越食越細，

真係好快絕跡！

如果有問價錢一定唔買